३० साउन, रामेछाप ।
रामेछापका विद्यालयहरूमा यतिबेला केही फरक माहोल छ—कक्षाभित्र किताब र बोर्ड मात्र होइन, एआईको चर्चा, रोबोटको चाल र आकाशमा उड्ने ड्रोनको गुनगुन सुनिन्छ।
नेपाली कांग्रेसको विद्यार्थी संगठन (नेविसंघ) अन्तर्गत सक्रिय युवा नेताहरूको एउटा टोलीले जिल्लाभरको विद्यालय–विद्यालय पुगेर नयाँ पुस्तालाई प्रविधिको वास्तविक स्वाद चखाउँदैछ। उद्देश्य स्पष्ट छ—विद्यार्थीहरूलाई भविष्यको विज्ञानसँग आजै परिचित गराउने।
यस अभियानको नेतृत्व रामेछाप गेलुका सञ्जय बुढाथोकीले गरिरहेका छन्। कोटेश्वर क्याम्पसको सहयोगमा सुरु भएको यो यात्रा हालसम्म आधा दर्जनभन्दा बढी विद्यालयसम्म पुगेको छ। टोलीसँगै रहेका नेविसंघ रामेछापका युवराज बुढाथोकी भन्छन्, “हामी किताबमा मात्रै सीमित हुन दिन्नौँ, बालबालिकालाई देखाएर, चलाएर, प्रयोग गराएर सिकाउँछौँ।”
विद्यालयका कक्षाकोठा ड्रोनको उडान परीक्षण स्थलमा, र रोबोटसँग हात मिलाउने ठाउँमा परिणत भएका छन्। अडियो–भिडियो बनाउने तरिका, ड्रोनमार्फत दृश्य कैद गर्ने सीप, र कृत्रिम बुद्धिमत्ताको आधारभूत अवधारणासम्म विद्यार्थीहरूले प्रत्यक्ष अभ्यासमार्फत सिकिरहेका छन्।
यो अभियानमा स्थानीय तहको पनि उल्लेख्य साथ छ। पालिका प्रमुखदेखि वडा अध्यक्षसम्म स्वयं उपस्थित भएर बालबालिकालाई हौसला दिइरहेका छन्। बिहीबार मात्र रामेछाप नगरपालिका–६ को जनकल्याण मावि र अन्य ९ विद्यालयमा वर्कसप सम्पन्न भयो।
कार्यक्रमका लागि नेपाल सरकारको प्रज्ञा प्रतिष्ठानद्वारा ‘युवा टेक्निकल एक्पर्ट’ उपाधि पाएका ई. शम्भु आचार्य, ई. प्रतीक महत, दिनेश धुन्जु श्रेष्ठलगायतका विज्ञहरूले हातमा उपकरण र दिमागमा ज्ञान लिएर विद्यार्थीलाई प्रशिक्षण दिइरहेका छन्।
अभियानका संयोजकहरूका अनुसार, यो सिकाइ यात्रा अझै केही दिन जारी रहनेछ र धेरै विद्यालयहरूसँग सहकार्यको तयारी भइरहेको छ। विद्यार्थीहरूको आँखामा देखिएको चमकले यो पहलले भविष्यमा ठूलो परिवर्तन ल्याउने संकेत दिइसकेको छ।
यो खबर पढेर तपाईलाई कस्तो महसुस भयो?
