२०८३ असोज ८
रामेछाप । नेपाली कांग्रेस रामेछापका प्रभावशाली नेता तथा पूर्व महासमिति सदस्य रत्नबहादुर कार्कीले नेपाली कांग्रेसको १५औँ महाधिवेशनका लागि रामेछाप जिल्लाबाट केन्द्रीय महाधिवेशन प्रतिनिधि (खुला १० तर्फ) उम्मेदवारी घोषणा गर्नुभएको छ।
रामेछाप जिल्लाको रामेछाप नगरपालिका वडा नं. १, गोठगाउँ स्थायी घर हुनुभएका कार्की निष्ठा, निरन्तरता र सांगठनिक पकड भएका नेताका रूपमा चिनिनुहुन्छ।
स्कुल र कलेज राजनीतिबाट केन्द्रीय यात्रा
नेता कार्कीको राजनीतिक यात्राको जग नेपाल विद्यार्थी संघ (नेविसंघ) बाट सुरु भएको हो। उहाँले विद्यालय स्तरबाटै नेविसंघको संगठन निर्माणमा सक्रिय भई विद्यार्थी राजनीति सुरु गर्नुभएको थियो। कलेज जीवन हुँदै उहाँले नेविसंघको माथिल्लो तह र केन्द्रीय राजनीतिमा समेत आफ्नो बलियो उपस्थिति र सक्रियता जनाउनुभयो।
विद्यार्थी आन्दोलन र लोकतान्त्रिक आन्दोलनहरूमा अग्रपंक्तिमा रहेर काम गर्नुभएका कार्कीले पार्टीको सांगठनिक जग बलियो बनाउन लामो समयदेखि निरन्तर योगदान पुर्याउँदै आउनुभएको छ।
२०७४ को प्रदेश सभा निर्वाचनका प्रत्यक्ष उम्मेदवार
पार्टी र जिल्लाप्रतिको समर्पणकै कारण वि.सं. २०७४ को आम निर्वाचनमा नेपाली कांग्रेसले उहाँलाई रामेछाप प्रदेश सभा क्षेत्र नं. १ (क) बाट प्रत्यक्षतर्फको आधिकारिक उम्मेदवार बनाएको थियो। तत्कालीन वाम गठबन्धनको कडा चुनौती र प्रतिकूल राजनीतिक वातावरणका बीच पनि उहाँले १६,०५८ मत प्राप्त गरी जिल्लामा आफ्नो व्यक्तिगत प्रभाव र सांगठनिक लोकप्रियता पुष्टि गर्नुभएको थियो।
१४औँ महाधिवेशनको अनुभव र १५औँमा नयाँ संकल्प
यसअघि सम्पन्न नेपाली कांग्रेसको १४औँ महाधिवेशनमा रामेछाप जिल्लाबाट महाधिवेशन प्रतिनिधि निर्वाचित हुनुभएका कार्की केन्द्रीय समिति सदस्यको उम्मेदवार तथा महासमिति सदस्य रहिसक्नुभएको छ।
रामेछाप कांग्रेसको संगठनलाई सुदृढ, एकताबद्ध र प्रविधिमैत्री बनाउन निरन्तर खट्दै आउनुभएका कार्कीले १५औँ महाधिवेशनमा पुनः रामेछापबाट केन्द्रीय महाधिवेशन प्रतिनिधि (खुला १०) मा आफ्नो उम्मेदवारी घोषणा गरेपछि जिल्लाका कार्यकर्ता तथा शुभचिन्तकहरूमाझ उत्साह छाएको छ।
साझा सिद्धान्त, निष्ठाको राजनीति र कार्यकर्ताको संरक्षणलाई आफ्नो मूल मन्त्र मान्नुहुने रामेछाप नगरपालिका–१ गोठगाउँका नेता कार्कीको यो उम्मेदवारीलाई रामेछाप कांग्रेसभित्र परिपक्व र सन्तुलित नेतृत्वको दाबीका रूपमा हेरिएको छ।
यो खबर पढेर तपाईलाई कस्तो महसुस भयो?
