२०८२ जेठ १४ गते
काठमाडौं । गत चैत १५ गते राजधानीको तीनकुनेमा राजावादीहरुले आयोजना गरेको आन्दोलनका क्रममा गोली लागेर गम्भीर घाइते भएकी रेविका खत्रीको न्यायको माग गर्दै कोटेश्वर क्याम्पसका विद्यार्थीहरुले नयाँ बानेश्वरस्थित संघीय संसद् भवनको मूल गेट अगाडि बुधबार विरोध प्रदर्शन गरेका छन्।
प्रदर्शनमा सहभागी विद्यार्थीहरुले “रेविकालाई न्याय दे”, “निष्पक्ष छानबिन गर” लगायतका नारासहित प्लेकार्ड बोकेर सडकमा उत्रिएका थिए भने केहीबेरमै प्रहरीले ८ जना विद्यार्थीलाई पक्राउ गरेको छ ।
गत चैत १५ गतेको आन्दोलनका क्रममा प्रहरी र प्रदर्शनकारीबीच झडप हुँदा प्रहरीले चलाएको गोलीबाट दुई जनाको मृत्यु भएको थियो भने केही घाइते भएका थिए। तीमध्ये एक उदयपुरकी २२ वर्षीया रेविका खत्री पनि परेकी हुन्, जसको आन्दोलनसँग प्रत्यक्ष कुनै सरोकार थिएन।
रेविका काठमाडौंमा आफ्नो पढाइको सिलसिलामा बसोबास गर्दै आएकी थिइन्। आन्दोलन चलिरहँदा उनी तीनकुने हुँदै कलेज जाने क्रममा अचानक लागेको गोलीले उनलाई घाइते बनायो। सुरुमा उनलाई सिभिल अस्पतालमा उपचारका लागि भर्ना गरिएको थियो । तर अहिले त्रिवि शिक्षण अस्पताल लगिएको छ।
न्यायको माग र सरकारको मौनता
विद्यार्थीहरुले रेविकालाई राज्यले उपचार खर्चको पूर्ण जिम्मा लिनुपर्ने, दोषीमाथि निष्पक्ष अनुसन्धान गरी कारबाही गर्नुपर्ने र यस्ता घटनाको पुनरावृत्ति नहोस् भन्नका लागि सुरक्षा संयन्त्रमा सुधार गर्नुपर्ने माग राखेका छन्।
सरकारले भने अहिलेसम्म घटनाबारे विस्तृत छानबिनको निष्कर्ष सार्वजनिक नगरेको भन्दै नागरिकस्तरबाट पनि आलोचना भइरहेको छ।
रेविकाको परिवारले समेत राज्यबाट पीडितको पक्षमा न्याय नपाएको गुनासो गर्दै आएका छन्। “न त दोषी पत्ता लागेका छन्, न त छानबिन समिति बनाइएको छ। हामीले न्याय पाउने आशै छैन जस्तो लाग्न थालिसक्यो,” रेविकाका परिवारले सञ्चारकर्मीसँग भने।
राजधानीको केन्द्रमै शान्तिपूर्ण प्रदर्शनका क्रममा एक निर्दोष युवतीलाई गोली लागेर घाइते हुनु र त्यसपछि पनि राज्यको चासोको अभाव हुनु गम्भीर मानवअधिकार उल्लंघनको सङ्केत हो। विद्यार्थीहरुको आवाज यो घटनालाई राज्यको प्राथमिकतामा ल्याउने प्रयत्न हो। अब सरकार र सुरक्षा निकायको भूमिकाले आगामी दिनमा न्याय स्थापित हुन्छ कि हुँदैन भन्ने निर्धारण गर्नेछ।
यो खबर पढेर तपाईलाई कस्तो महसुस भयो?
