२०८२ साउन ३० गते
रामेछाप नगरपालिका–१, गोठगाउँस्थित श्री भूमेश्वर आधारभूत विद्यालयका शिक्षक सरोज भट्टले आफ्नो शिक्षाप्रतिको प्रतिबद्धता र विद्यार्थीप्रतिको प्रेमको अद्भुत उदाहरण प्रस्तुत गरेका छन्।
सुदूरपश्चिम प्रदेश, कञ्चनपुर जिल्लामा जन्मिएका २५ वर्षीय भट्ट हाल बागमती प्रदेश, रामेछाप जिल्लाको गोठगाउँमा कार्यरत छन्। उहाँ २०८० साल वैशाख १ गतेदेखि निमावि राहत तहका अङ्ग्रेजी शिक्षकका रूपमा नियुक्त भई विद्यालयमा अध्यापन गर्दै आउनुभएको हो।
बिदामा पनि निरन्तर ट्युसन
विद्यालयको नियमित पठनपाठनसँगै, सरोज भट्टले बर्खे बिदा वा अन्य छुट्टिहरूलाई पनि विद्यार्थीको सिकाइ उन्नत बनाउन प्रयोग गर्दै आउनुभएको छ। यस वर्षको वर्षे बिदामा उहाँले—
• कक्षा ८ का लागि विज्ञान तथा प्रविधि विषय
• कक्षा ३ देखि ८ सम्मका लागि आधारभूत अङ्ग्रेजी भाषा
निःशुल्क रूपमा अध्यापन गर्नुभयो।
एक महिना लामो कक्षा अवधिमा विद्यार्थीहरूले नियमित र सक्रिय सहभागिता जनाए। विज्ञानमा पाठ्यक्रमका जटिल अंशहरूमा प्राथमिकता दिइयो भने अङ्ग्रेजीमा दैनिक जीवनका शब्दावलीदेखि वाक्य निर्माणसम्म सिकाइ भयो।
पुरस्कार वितरण पनि आफ्नै खर्चमा
कक्षाको अन्त्यमा उपलब्धि मूल्यांकन परीक्षा सञ्चालन गरियो। उत्कृष्ट विद्यार्थीलाई विशेष पुरस्कार र अन्य सबैलाई सान्त्वना पुरस्कार स्वयंको खर्चमा वितरण गर्नुभयो। यो काम उहाँले केवल यस बिदामा मात्र होइन, गत चैत महिनाको बिदामा पनि गर्नुभएको थियो।
निरन्तर प्रेरणा र विविध विषय अध्यापन
नियमित पठनपाठनको समय पनि भट्टले विद्यार्थीलाई खुसी पार्दै, कहिले मिठाइ, कहिले विभिन्न पुरस्कारहरू प्रदान गरेर पढाइमा उत्साहित बनाउने गर्नुहुन्छ। यसले विद्यार्थीहरूमा अध्ययनप्रतिको रुचि बढाउनुका साथै नतिजामा समेत सकारात्मक सुधार आएको छ।
अङ्ग्रेजी मुख्य विषय भए पनि, विद्यालयको आवश्यकता अनुसार उहाँ अन्य विषय पनि अध्यापन गर्न सधैं तत्पर रहनुहुन्छ।
समुदायमा प्रभाव
भट्टको निरन्तर प्रयास र त्यागले गाउँको शैक्षिक स्तरमा स्पष्ट सुधार आएको छ। बिदामा पनि विद्यालयमै बसेर निःशुल्क ट्युसन सञ्चालन गर्नु, आफ्नै खर्चमा पुरस्कार वितरण गर्नु, र विद्यार्थीलाई पढाइप्रति उत्साहित बनाउनु—यी सबै कार्यहरूले उहाँलाई समुदायमा एक प्रेरणादायी शिक्षकको रूपमा स्थापित गरेका छन्।
भट्टले अभिभावकहरूको सक्रिय सहयोग र विद्यार्थीहरूको मेहनतलाई आफूले पाएको सबैभन्दा ठूलो पुरस्कार मानेका छन्। उहाँको भनाइमा,
“ज्ञान केवल पाठ्यपुस्तकमा सीमित हुनुहुँदैन, जीवनमा लागू हुनुपर्छ।”
यो खबर पढेर तपाईलाई कस्तो महसुस भयो?
